陳法蓉被爆桃花旺 蔡少芬唔飲酒封「不醉王」

四位「凍齡女神」蔡少芬、朱茵、陳法蓉及洪欣是圈中出名的閨蜜團,最近她們更組成女團「港普F4」出道,並首度合體登上內地真人騷節目《請吃飯的姐姐》,節目中四人不時互爆往事,盡顯姊妹情深。日前四人再次接受考驗,大玩「港普F4」之最,選出最多人追、最易嬲、最不守時、最飲得、最易呃及最囉嗦、最有錢等人選,結果「桃花王」竟然由陳法蓉所得,而朱茵及蔡少芬分別被封為「遲到王」及「不醉王」,至於洪欣成為「易嬲王」,認真各有千秋。

「港普F4」蔡少芬、朱茵、陳法蓉及洪欣互爆往事。

「港普F4」位位都是女神級人馬,究竟四人當中哪一位成員多男士追求?結果票選後,由陳法蓉被選為「桃花王」,朱茵還表示:「佢(即陳法蓉)不停享受被追求嘅感覺,如果唔係,佢已經結婚。」而陳法蓉亦笑言自己實至名歸:「我有好多人追,但我唔鍾意嘅話我會拒絕,唔會畀對方希望、浪費對方金錢及時間,呢個秘密唔係太多人知,因為好多時啲人見唔到我身邊有太多男性出現,但其實我拍拖非常機警,拍咗你哋都唔會知。」

其實陳法蓉被選為「桃花王」同時,她亦一致被選為「囉嗦王」,蔡少芬指:「例如我哋今日要嚟呢個地址咁吖,佢(陳法蓉)google個地址畀我哋,仲要括住呢個地址,我哋話明架喇,佢仲要問係咪真係明架,仲要好詳細咁再講一次,你話佢囉唔囉嗦吖!」不過陳法蓉笑稱自己不是囉嗦,只是詳細,她解釋:「係非常詳細,佢哋有咩想問,無論係問路、問咩電器好用、有咩大減價,佢哋都好鍾意問我,而我亦會上網尋求各方答案及分析。」

朱茵自誇大人物

講到「遲到王」及「不醉王」分別非朱茵及蔡少芬莫屬。「港普F4」中,原來最不守時是朱茵,蔡少芬指:「例如我哋約佢(朱茵)半個鐘後見,佢通常三個鐘後先出現,甚至乎唔出現,但佢而家有咗個囡之後,約佢,佢已經準時好多,但都係會遲。」而被封為「遲到王」的朱茵,對此直認不諱,她還笑說:「因為我係大人物!」至於,被票選為「不醉王」的蔡少芬,直指其他三位好姊妹是「老人家」,只顧養生,不喜歡飲酒,蔡少芬說:「佢哋出嚟好悶架,一人一支熱滾水或蔘茶,佢哋三個係老人家嚟,但我唔係,我係時代感、年青一輩,我會飲紅酒或者啤酒。」

此外,蔡少芬亦當選四人之中的「大富婆」,朱茵指:「Ada最忙,每次約佢,佢都在工作,最愛錢就係佢。」而陳法蓉指蔡少芬除賺錢多之外,還很節儉,所以認為她們四人之中,蔡少芬是最有錢,而蔡少芬亦承認表示:「我會集中把所有錢放在投資、可以再生錢,例如買樓,朱茵喜歡放在自己臉上,法蓉喜歡買東西、買衫,洪欣就一半一半。」

洪欣易呃又易嬲

而洪欣分別當選成為「易嬲王」、「易呃王」及「口疏王」,其中蔡少芬笑指洪欣:「佢守唔到秘密,尤其是佢嬲起上嚟發顛嘅時候,乜都爆晒出嚟。」而洪欣亦承認自己性格屬於率直及火爆型,不過問到她為何成為「易呃王」?她說:「佢哋成日講笑嘅嘢,我都會當真。」

【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟