陳宇琛剖白入行18年辛酸史 憶TVB山頭文化令自己失很多機會

剛踏入42歲的陳宇琛(Sam),日前有感而發,在IG發千字文剖白自刁入行18年的心路歷程,他表示:「2004年嗰陣我24歲孭住『星二代』包袱入行。好多人以為係一條捷徑,但實際上係一條好艱難嘅路。入行嗰陣得到好多關注,但係我嘅成長一直好低調,所以當時唔識面對同處理。感覺好尷尬,好似俾人一直批判。加上大家對我嘅表現有好大嘅期望,而我對自己都有好高嘅要求,非常大壓力。同時間經常有人同我講要喺呢一行生存,就要聽話。因為咁,我慢慢迷失咗自己嘅定位identity,開始封閉自己。」

他之後提到自己效力TVB時的歷程,「點都好,喺TVB頭五年都好充實有好多得益, 參與過各種各樣嘅製作,我自己都非常投入因為知道機會難求。『四葉草』確實係一個美好嘅回憶,因為嗰次嘅演出終於有監製留意到,令我可以開始拍劇。 我對每一個角色都放咗好多心思去設計,所以每次係街度見到fans同我講佢哋好鍾意睇我做戲,我都好appreciate。 」

其後,Sam提到TVB的山頭文化,「不過喺大台工作第五年之後,就發生人事大變動。山頭文化嘅現實, 突然間令我失去咗好多我應該有份參與嘅劇集演出,幕前工作180度轉變,俾人安排做返一啲啱啱入行嘅嘢,完全唔起眼嘅節目。當時感覺好難受,好似俾人betray,對公司好信任亦付出咗咁多,拍劇捱到體力透支,身體受傷都好似白費晒。因為好鍾意做戲以為仲有一絲希望都想堅持落去。我唔係帶錢返工嘅人,嗰陣每個月人工係8000元,有時到月尾戶口得返$100-200,好彩自己喺出邊都接到啲jobs可以頂得住吓。不過咁都未算最谷底,大概嗰段時間,拍咗拖七年嘅未婚妻同我講要call off婚禮,感情同事業都失敗令我跌咗入一個好dark & depressed嘅位。終於到我喺TVB第10年,2014年有一間籌備中嘅電視台(HKTV)搵我過檔,offer我四倍嘅人工,我考慮咗好短時間就應承咗。 」

Sam表示,在HKTV嘅經歷係好滿足,係自演藝生涯中,第一次真正得到作為artist需要嘅照顧,「見返好多TVB 台前幕後並肩作戰嘅舊同事,亦被安排做男一,一套劇接一套,而第一套劇嘅對手係影帝影后。過到新環境,有監製話喺舊公司好想同我合作,覺得我可造性高。台前幕後都有好多溝通,個感覺係大家都有一團火,想創新同製作高質素嘅節目俾大家睇。因為咁我嘅演技有機會突破, it sharpened my skills, and definitely reignited my passion. 不過開心嘅時間過得好快,眨下眼就兩年,跟住大家都知道發生乜嘢事啦。 坦白講,呢次嘅感覺係由更高嘅位一腳𨅝咗落嚟,不過係我自己嘅選擇,因為加入HKTV時都知道會有呢個可能性,所以繼續向前行,無諗過返轉頭。」

他最後提到有份拍攝ViuTV劇集《男排女將》的感受,「近呢兩年,有機會參與多咗幕前嘅工作,拍《男排女將》係HKTV拍《四年B班》嘅舊同事推薦我飾演黃金sir呢個角色。我亦好認真去做足功課,感恩大家對黃金sir嘅愛護。開頭有啲緊張,因為好耐無拍劇,希望自己可以發揮得好,可以為團隊同拍檔add value。因為呢幾年幕後嘅工作,自然反應係要照顧大家,所以同台前幕後嘅團隊,尤其係一班年輕人都傾得好投契。」

陳宇琛IG圖
陳宇琛IG圖
陳宇琛IG圖
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟