C AllStar 演唱會明天公開售票 釗峰笑言不要撳爛「F5」掣

(資料圖片)

恭喜 C AllStar 7月24及25日紅館《FWD富衛保險呈獻:C AllStar 集合吧演唱會2021》優先訂票,火速售罄!反應熱烈,四子非常開心,但同時他們卻因為飛債纏身好頭痛,梁釗峰更為此公開向媽媽道歉,促她明早(16日)十點準時上網公開發售撲飛,笑言不要撳爛F5掣!

倒數尚有一個多月,C AllStar 第三次紅館開唱,因為首次四面台表演,心情特別興奮和緊張。上星期東亞銀行信用卡客戶預訂票,即開即爆,為他們打了一支強心針。開心之餘,釗峰亦表示好頭痛:「優先訂票好快賣晒,陸陸續續好多朋友買唔到都打電話嚟搵我訂飛,我有好多飛債呀!」吳崇銘(King) 安慰他,說:「其實唔使咁驚,因為仲有公開發售嘛,仲有機會買到飛。」釗峰呼籲:「唔好問我有無內部飛,請喺6月16號早上十點準時去售票網站撳F5啦!」然後他雙手合十,一臉可憐地向媽媽道歉:「媽媽,如果再要飛都要上網撳呀!」他所指「F5」是電腦鍵盤的「重新下載」功能鍵,每當遇到撲飛潮,網絡大塞車,Fans就會瘋狂重按F5更新頁面,務求衝入訂購版面,成功撲飛。何建曦(Jase)祝願:「希望大家嘅keyboard,喺今次搶飛之戰後,F5 安好啦!」

一票難求,釗峰笑言好奇King和Jase 如何安排多位紅顏知己的座位?他問King:「你啲妃嬪係咪分四面台分四邊坐?如果咁啱坐埋同一行點算?」又問Jase:「你啲Baby Girls又點分布呢?」King即刻拉埋釗峰落水,笑言:「我啲妃嬪就會坐喺你啲妃嬪隔離。」陳健安(On 仔)懶理三子講到嘻哈大笑,他認真地用手指檢查釗峰胸肌,他說:「我幫大家Check吓啲質地,釗峰硬咗喎,做過咩嚟?」身旁King有樣學樣,篤完釗峰又篤On仔胸肌,再篤自己比較,然後一臉權威地說:「釗峰又未夠On仔咁硬!」釗峰說:「我都冇佢咁大。」

Jase笑說:「釗峰被On仔撳完之後硬咗!」四個大男孩為胸肌議論紛紛,原來他們為了配合今次演唱會服裝備戰,King說: 「大家練咗咁耐,當然會有啲服裝可以Show到成果。今次無論台、燈、聲和服裝,都比我哋以往演唱會更貴更靚,睇我哋張海報都知咁多設計就知,所以真係好抵睇。」對於全場劃一票價,他們向Fans大派定心丸:「劃一票價人人平等,個個都係靚位,放心,無論坐邊個位都有可觀性。」

【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟