何啟華@Error扮劉德華 盧覓雪:鄭中基接班人

組合Error成員何啟華(Dee)早前與盧覓雪合作網劇,阿Dee因扮劉德華(華仔)令盧覓雪(雪雪)仲笑唔停,仲讚他天生有喜劇感,是鄭中基的接班人。

盧覓雪與何啟華拍攝跳舞戲份。

hmvod 原創作品《向西聞記 新春sp:阿姨!我不想努力了!》已於年初一上架,截止昨日年初三(2月14日),該片瀏覽量已破了 hmvod 的所有電影首播日 views 記錄,比之前位列首播日最高 views 的《復仇者聯盟》(The Avengers)及《TENET天能》(Tenet)高出一倍,更比《向西聞記》第一季劇集首播日的點擊率,高出三倍之多!

何啟華(Dee@Error)和盧覓雪前日一齊開直播,講述拍攝趣事,阿Dee更即場扮劉德華,笑到雪雪擰歪臉。提起扮劉華,要重提阿Dee在《向》中跟雪雪共舞的一幕搞笑戲,由於有一個動作要阿Dee抱住拗腰後彎的雪雪,但雪雪比較重,阿Dee唔夠力,其下盤愈滑愈低, 兩人在綵排這場跳舞戲時,阿Dee挈V字馬太行,結果擘到條褲爆呔,條褲由前面裂到後面,笑到全場黐總掣,阿Dee自己都笑唔停,邊笑邊走到房間換上單車褲,將爛褲交俾服裝姐姐補癃,阿Dee在現場說:「頭先我聽到『啪』一聲,我爆咗呔, 擘得勁得滯,弓字步嚟得太行,條褲承受唔到,唔關雪姐事。陣間仲擘唔挈?擘!陣間擘照去,就拍畀你睇我爆呔。」

何啟華和盧覓雪分享拍攝趣事。

事後雪雪亦笑說:「我笑到肚都攣埋,因為佢一路扮嘢一路擘腳,我笑到氣咳,阿Dee有啲部份扮劉德華,佢扮華仔出名,呢次佢近距離喺我眼前現場咁扮,排戲時候我笑到斷氣咁滯。」雪雪因為一望到阿 Dee 個劉華樣就忍唔到笑,所以特別在埋位前盡情笑,笑到攰為止,因為她正式拍時要扮cool不準笑。經過今次合作,雪雪對阿Dee讚口不絕:「佢好有喜劇感,佢啲喜感係天生,好似鄭中基、林雪,天生有喜劇感,我覺得佢係鄭中基接班人,好識搞笑又好好笑。」

何啟華扮劉德華拍攝跳舞戲份「爆呔」,盧覓雪忍唆不禁。

監製蕭定一表示在大初一當日看《向》片,竟然感動得喊了15分鐘,所以他在facebook發文抒發感受,他在亦語音群組Apps說:「我對成績相當滿意,嗰日我真係喊咗15分鐘收唔到聲。」他續解釋因為成件事感受到團隊好趕、好辛苦,由構思到上架二十日咁短時間做好質量,好多謝主創同成個團隊。

【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟