羅力威陪入產房 雨僑誕6磅重囡囡改名Harper

在疫情下娛樂圈傳來喜訊,羅力威與老婆雨僑的愛情結晶品終於出世。日前雨僑已入院待產,而羅力威一直陪伴在側,見證女兒降生的一刻。雨僑下午更在IG上報喜,順利剖腹誕下了6磅重的囡囡,更分享了與初生女兒頭貼頭而老公羅力威就親吻她額頭的溫馨照片,雨僑更表示︰「謝謝哥哥姐姐們的祝福和禱告,羅小姐報到。」雨僑又透露,已為女兒改了Harper的英文名,老公羅力威更陪了她入產房見證女兒出世。

B女的出生日期係88日早上8時,三條8易記又好意頭,雨僑就表示:「BB係今日88號朝早8點開刀生,不過都真係咁啱,我哋冇特別揀,係醫生呢日得閒就揀咗呢日。好順利出世,好健康,好快就生咗。」

在疫情下迎接小生命降臨,雨僑亦說非常難忘,「比較深刻係喺疫情底下會有好多不便,但對我嚟講係一個特別回憶,咁又唔係真係好麻煩,都係入院之前因為都未有咁多政策,要喺私家醫院做深喉唾液樣本,攞咗個報告先有得入院,先生有得陪產,但陪完要即刻走,冇得喺病房照顧,每日探病都係兩餐送飯時間,冇得長時間陪,所以都同我一直預想生BB嘅境況有啲唔同,但係我覺得為咗我哋、醫護同其他病人嘅安全,呢啲處理都係好恰當,所以我哋都好配合,其實醫院都照顧得好好,老公嚟玩吓BB、抹吓汗就ok,反而我都仲輕鬆啲,因為醫護照顧更加專業,我老公有陪產但冇剪臍帶,我哋一家人都非常開心。」

羅力威就表示沒有為囡囡剪臍帶是因為他全程看着雨僑,「全程望住、陪住老婆冇行開過,冇特登行過另一邊剪。」看到囡囡第一眼時,羅力威表示很感動,但沒有喊,「當然真係好感動,但同時都好緊張,亦都要陪住太太,因為就算麻醉都會驚,驚佢會驚。」問到囡囡似自己還是雨僑?羅力威說雖然雨僑認為囡囡比較似他,但他笑說暫時兩個都唔似,「一開頭睇超聲波片我覺得係似似哋我,但出咗嚟之後又唔算特別似,兩個都唔特別似, 哈哈。」

至於如何獎勵老婆,羅力威說暫時最重要是讓雨僑身體復原,「冇話獎唔獎勵,我會好好咁照顧佢等佢復原,總之唔好為佢添任何嘅辛苦啦,等佢最輕鬆,等佢快啲好番,同佢可以食番多啲好嘢。」

雖說沒有特別獎勵太太,但羅力威透露特意為太太及囡囡買了車,「因為疫情關係,帽同口罩都冇適合BBsizeBB又唔可以遮塊面。始終而家嘅交通工具我哋都唔係超級放心,加上為咗方便老婆同BB,買咗架車就會安全啲、安心啲。」果然是廿四孝老公兼爸爸。

雨僑IG圖
雨僑IG圖
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟